پیژگاهءِ چِنال

واب ءُ وشبو دُرها پیژگاهءِ چِنالءَ گوں بندوک اَتنت
دو کپودر  دو پُل
بُرزی شاهءِ سرا گوں وتا شاد اَتنت، مهر آباد اَتنت
جهلتِریں شاهڑءَ  یک کشے تُن ماں چاگلءَ درتکگ اَت
یک کشےءَ کٹورے گوں آبریشماں
نوبتءِ چاڑ چو کودکیں زهگےءَ
دل کرار اَت هما هونکیں ساهگءَ
گوں بدل بوتگیں موسمانی بد ءُ سُتکگیں نیّتءَ
آس گورتگ اجب شپ گِروکیں جُڑاں
تُن چو شیرگیں اِشکرےءِ وڑا ایر رِتکگ گشئے روتگانی تها
رهگوزیں وهد اوں په گِدارے پدا مان نتَر اِت نئیاتک
چه کئے هالے گِرئے
آ نِدارگ کجام پُرشتگیں شیشگءِ ریزگاں رِتکگ اَنت
بار بوتکگ کجا نوداں کوڑاچهیں
آس لُرداں کجام دوزهیں کانیءِ باتنءَ سنگرئے
گواتءِ همراهیءَ آ دو پُلانی بوه
در سفر داں کجام منزلاں گوستگ اَنت
آ  کپودر کجام جنگلءَ وپتگ اَنت
تُن ءُ چاگل کجا هوریءَ رپتگ اَنت
آ کٹورءَ کجام آزمانءَ جتگ سنج گِستائیءِ
گوں همے جیڑگاں تلوسئے تلوسئے اُمرےءَ دم برئے
کئے بزانت ابرمءِ لاڑکیں بی بیءَ
چونیں بندیکےءَ ڈَکّ داتگ شُتگ
سُهب  ءُ بیگاه ءُ  شپ
وهد ءُ پاس ءُ زمان،  زِر، زمین، آزمان
گوں بدل بوتگیں موسمءِ نیّتءَ کُل بدل بوتگ اَنت
واب چو بستگیں گرنچےءَ بُتکگ اَنت
چم پَر رِتکگ اَنت
نوں اے ترکّاں بُگش چون چونءَ گِرئے
پال تَرّینتگ اَنت ساهریں نوبتاں
واب ءُ وشبو درها پیژگاهءِ چِنالءَ گوں بندک اَتنت