من ءُ اسکندریہ ، نیل ءُ تمبورگ

قلوپطرا
منا بس کدهے درکار زہرانی
کہ من چہ زندگیءِ جنگجاه ءِ جیڑہاں دَمبرتگان ءُ اتکگاں پہ تو
نہ پہ تو نہ
پہ تئی تریاک ءُ سیاه ماراں
کہ من چہ زندگی ءِ بینگیں داباں دِل آزاراں ‏
دُرہیں ”اِسکندریہ” ہون ءِ بو ءَ کنت ہما اِنت ”روم “ وتکوش اِنت
تئی زیبائی ءَ انتھونی ءُ سیزر مہ سگاتاں
دوئیں آڈال ءُ ہیراتاں
زمانگ پِرگوزنت روچے پدا کہ دَۆر واتر اَنت
ملوریں چول نیل ءِ داگ ءُ پولنگاں بشوداں وہد ءُ پاسانی
چراگے کسہاں بیاریت شپاں لزت زِبہرانی !
قلوپطرا
منا تمبورگے گون اِنت
نہ زہمے است نہ اِسپر ، نہ تخت ءُ تاج نہ لشکر
کہ تئی عشق ءَ گوں جند ءِ لشکر ءَ داوائی مان بیاہاں
ءُ ”روم“ ءِ بُرتگیں باج ءَ بہ باہیناں
بدروہاں جند ءِ ہمراہاں
منی کار ءُ کسّب دل ستکگیں گال ءِ کماہگ
گم شموشیں سوت پِربندگ
کہ من پہ زندگی زندگ
اے شہر ءِ تیوگیں موسم منی تمبورگ ءِ تاراں گوں پیوستاں
من ءُ اسکندریہ نیل ءُ تمبورگ
وتی چاڈ ءَ گوں سر مستاں
منا عشق اِنت گوں اِے شہر ءَ ، من دیوانگ اِے دَمکانی
منی تمبورگ ءَ مہر انت گوں نیل ءَ
چِد ءُ پیسر کہ رومی مئے کتابجاہاں بسوچاں
ساز ءُ ازباباں بپروشاں
مان بداراں ہلک ءُ بازاراں
بہ سِنداں زیمراں اوں چہ منی تمبورگ ءِ تاراں
دمے لُکتِر کنگ لوٹی اِے اہد ءِ مشکلیں پندے
گلاسے زہر ءُ دستونکے
دو دَم تریاک ءُ پِربندے
من اِے دزگیریں پاساں پیش کمے سرگِرگ لوٹاں
مُلوریں” نیل “ ءِ امبازاں پہ دائم اِنسرگ لوٹاں
مِرگ لوٹاں
قلوپطرا چہ گنجءَ اچ تئی فرعونی پہرانی
منا بس کدّھے درکار زہرانی !