بازی

رقص گاہءِ تَلوءِ کُلیں ندارگ مُرتگ اَنت

لڈّتگ پروانگاں تہنا چراگءِ زنگی ئیں کانچءِ سرا

دُوتّانی سیاہی منتگ اَنت

گندلءِ کِرچکانی کسّہ اوں شپءِ پیشانیءَ

چو تالہءَ مان اتکگ اَنت

بے رزا، بے ہاترا

لہتیں ہُشکیں تاک ءُ لہتیں مُرتگیں پُلّ اَنت سرجاهءِ سرا

لہتین پولنگ اَنت ماں دیوال ءُ دراں پش کپتگ اَنت

جِدی ئیں نئوکر تئوامیں سنگ ءُ سیاه انت ماں گلام چوٹءِ دَپءَ

مولدانی نکش گار اَنت

تہنا دزگُلیں رزان اَنت پیژگا ءَ کَپتگ اَنت

تلوسیت بیوانکیءِ ارواه په چیهالےءَ

وهد اوشتاتگ گشئے چو پُرشتگیں گڑیالےءَ

سئوت نیست زہیروک نیست دِل سُتکگیں، دپگال نیست

ساز ایر اَنت پُرشتگیں سازندہانی ہال نیست

شپچراں سُلتانیءِ پاگے سرا اِنت گُنبدءَ

بے تئواری راگ الہانیت چِرّت چاڑیں شپاں

ایوکی تہنا چو کِٹّارءَ

کلاتءِ چاریں کُنجاں دُمب جنت

سنگرءِ دراہیں سپاہی تتکگ اَنت

میّت اَنت نیم سُتکگیں، چم بَستگیں لاش اَنت که لونجان اَنت چار راهءِ سرا

لئیب لئیبءَ نوبتءَ یک انچیں دستے کاٹِتگ

بادشاہ یکّاءِ تُرسءَ دُور ءُ گِستا جنگلءَ زنکُرّتگ

پُلّءِ بی بی اِہوتءَ ہُکمءِ گُلامءَ بُرّتگ