من ءُ دل هردو کوڑاچه

دلءَ ماه ءِ نِوان ءَ کاپَرے بسته
ءُ من گیشکور ءِ لمب ءَ پُرشتگیں وابانی کَرگینے
من ءُ دل هردو کوڑاچه
گوں وهد ءِ جَلّک ءَ تّران ءُ پِر تَرّان چو باریگ ءَ
وتی بے رنگی ءَ گوں ابرم ءِ رنگاں رَجاناں ما
ابیتکیں موسمانی بےترهیں پاساں
چو کرپاس ءَ شِناناں ما
کپوتی کوکوے ءَ بستگیں اهدانی پِریاتے سدا ساچیں
چو گوات ءِ سنگهاں برمشیت
چو نودی دیدگاں شنزیت
من ءَ دل  سنج ءُ جمبر
کوش ءُ وشبو یا کپوت ءَ کوکو ءُ زیمر
زمین ءُ زِر
دُرها گوں اَبرم ءِ آدینک ءِ رنگانی گُباراں انچو پیوستاں
که هر رنگ ءَ
هُدا  ءَ گوں وتی بےگواهیں جند ءِ هستی ءَ گنداں
من ءُ دل هردو کوڑاچه
وت ءَ گوں جیڑگانی زِبر ءُ الماسیں زِهاں بنداں ءُ بچکنداں
بلوریں آبشارے ءِ نوان ءَ بستگیں کرگینے ءَ
آباد گیابانے زهیرانی
دلءِ دیوانگی ماه ءِ نوان ءَ باڑهی بنگاں ملارینتگ
گشے ماں کلکشان ءِ گوانزگ ءَ اِستال کوچنڈنت
اِے شاگ ءَ موتک ءُ لیلو ءَ تپاوت نیست
اِے انچیں پَترے که پُرس ءُ شاده یک هساب ءَ اَنت
محبت بس محبت
گوں وتی جند ءَ
ءُ هر چیز ءَ که ُپیوستگ گُباراں ابرم ءِ سنج ءِ رهامانی
اَجب بے لِزتی ءِ لِزتے
دیوانگی چو تاسے ءِ لُنٹانی هوشام ءَ
وتی کئیپ ءَ چه سَر رِتکگ
من ءُ دل هردو کوڑاچه
ءُ کوڑی گوپتگیں بندیکے ءِ
تاباں چو پَر رِتکگ .